സഞ്ചാർ സാഥി ; നഷ്ടപ്പെട്ട സ്വന്തം ഫോൺ ഉടമയ്ക്ക് നേരിട്ട് ബ്ലോക്ക് ചെയ്യാം

നഷ്ടപ്പെട്ട ഫോണുകൾ ബ്ലോക്ക് ചെയ്യാൻ എളുപ്പവഴിയുമായി ‘സഞ്ചാർ സാഥി’. 2019ൽ ആരംഭിച്ച സേവനമാണിത്. ഡൽഹി, ഗോവ, മഹാരാഷ്ട്ര, ദാദ്ര, നാഗർ ഹവേലി എന്നിവിടങ്ങളിലായിരുന്നു ഇതുവരെ ഈ സേവനം സജീവമായിരുന്നത്. നഷ്ടപ്പെട്ട ഫോണുകൾ ബ്ലോക്ക് ചെയ്യാൻ ഉൾപ്പെടെ സഹായിക്കുന്ന ഈ കേന്ദ്രപോർട്ടൽ എല്ലാ സംസ്ഥാനങ്ങളിലും പ്രവർത്തനസജ്ജമാകും. കേന്ദ്ര ടെലികോം വകുപ്പിനു കീഴിലുള്ള പോർട്ടലിന്റെ ഔദ്യോഗിക ലോഞ്ച് നാളെയാണ്.

നിലവിൽ പോലീസ് വഴിയാണ് നഷ്ടമായ ഫോൺ ബ്ലോക്കിങ് നടപടിക്രമങ്ങൾ ചെയ്യുന്നത്. ഇനി വ്യക്തികൾക്ക് സ്വന്തം നിലയിൽ തന്നെ ഫോൺ നഷ്ടമായത് സംബന്ധിച്ച് ഓൺലൈനായി അപേക്ഷ നല്കാം. നഷ്ടപ്പെട്ട ഫോൺ ബ്ലോക്ക് ചെയ്ത് കഴിഞ്ഞാൽ പുതിയ സിം പ്രയോജനപ്പെടുത്തിയും ഫോൺ ഉപയോഗിക്കാനാവില്ല. ഫോൺ ഉടമസ്ഥന് തിരിച്ചു കിട്ടിയാൽ അൺബ്ലോക്ക് ചെയ്യാം.
‌
ബ്ലോക്ക് അല്ലെങ്കിൽ അൺബ്ലോക്ക് ചെയ്യാനായി പൊലീസിൽ പരാതി നൽകിയശേഷം അതിന്റെ പകർപ്പെടുത്ത് സൂക്ഷിക്കണം. കൂടാതെ നഷ്ടപ്പെട്ട സിം കാർഡിന്റെ ഡ്യൂപ്ലിക്കേറ്റും കരുതണം. സഞ്ചാർ സാഥിയിൽ റജിസ്റ്റർ ചെയ്യുമ്പോൾ ഒടിപി ഇതിലേക്കായിരിക്കും വരിക. www.sancharsaathi.gov.in എന്ന സൈറ്റിൽ ‘ബ്ലോക്ക് യുവർ ലോസ്റ്റ്/സ്റ്റോളൻ മൊബൈൽ’ എന്ന ടാബ് ഓപ്പൺ ചെയ്യുക. നഷ്ടമായ ഫോണിലെ മൊബൈൽ നമ്പറുകൾ, ഐഎംഇഐ നമ്പറുകൾ (*#06# ഡയൽ ചെയ്താൽ അറിയാം), പരാതിയുടെ കോപ്പി, ബ്രാൻഡ്, മോഡൽ, ഇൻവോയ്സ്, പൊലീസ് സ്റ്റേഷനിൽ പരാതി നല്കിയതിന്റെ വിവരങ്ങൾ, ഐഡി പ്രൂഫ്, ഒടിപി ഉൾപ്പെടെ സബ്മിറ്റ് ചെയ്യുക. അപ്പോൾ കിട്ടുന്ന റിക്വസ്റ്റ് ഐഡി സൂക്ഷിക്കുക. പോലീസ് വഴി നിലവിൽ ഇതെ റിക്വസ്റ്റ് നേരത്തെ ലഭിച്ചിട്ടുണ്ടെങ്കിൽ “Request already exist for..” എന്ന മെസേജ്, നല്കിയ നമ്പരിൽ കിട്ടും. ഫോൺ തിരികെ ലഭിച്ചാൽ Unblock found mobile എന്ന ഓപ്ഷനിൽ ‘ബ്ലോക്കിങ് റിക്വസ്റ്റ് ഐഡി’ അടക്കം കൊടുക്കുക. ‘Know your mobile connections’ എന്ന ടാബ് വഴി ഒരാളുടെ പേരിൽ എത്ര മൊബൈൽ കണക‍്ഷനുണ്ടെന്ന് അറിയാനുമാവും.