കരാര് നിയമനത്തിന് പട്ടിക ആവശ്യപ്പെട്ട് നഗരസഭാ സ്റ്റാൻഡിംഗ് കമ്മിറ്റി ചെയർമാൻ ഡി ആര് അനില് അയച്ച കത്തില് വിശദീകരണവുമായി സിപിഎം കൗണ്സിലര് അംശു വാമദേവന്. തിരുവനന്തപുരം നഗരസഭ പാര്ലമെന്ററി സെക്രട്ടറി കൂടിയായ ഡി ആര് അനില്, സിപിഎം ജില്ലാ സെക്രട്ടറി ആനാവൂർ നാഗപ്പന് അയച്ച കത്തിനെ കുറിച്ച് ന്യൂസ് അവറിലാണ് അംശു വാമദേവന്റെ വെളിപ്പെടുത്തല്. തിരുവനന്തപുരം നഗരസഭ പാര്ലമെന്ററി സെക്രട്ടറി എന്ന നിലയില് കത്ത് തയ്യാറാക്കിയിരുന്നുവെന്നും എന്നാല് അത് ജില്ലാ സെക്രട്ടറിക്ക് കൈമാറിയിട്ടില്ലെന്നും ഡി ആര് അനില് പറഞ്ഞുവെന്ന് അംശു വാമദേവന് ന്യൂസ് അവറില് പറഞ്ഞു.
എസ് എ റ്റി ആശുപത്രിയിലെ കൂട്ടിരിപ്പുകാര്ക്കായി നിര്മ്മിച്ചിരിക്കുന്ന വിശ്രമകേന്ദ്രം തുറക്കുന്നില്ലെന്നും തിരുവനന്തപുരം നഗരസഭ വന് അലംഭാവം കാണിക്കുന്നുവെന്നും എന്ന തരത്തില് മാധ്യമവാര്ത്തകൾ വന്നതിന്റെ അടിസ്ഥാനത്തില് കുടുംബശ്രീ പ്രവര്ത്തകരെ നിയമിക്കുന്നതിനായി രാഷ്ട്രീയസമ്മര്ദ്ദം ചെലുത്തണമെന്ന് ചൂണ്ടിക്കാട്ടി പാര്ലമെന്ററി സെക്രട്ടറി എന്ന നിലയില് ജില്ലാ സെക്രട്ടറിയോട് ആവശ്യപ്പെടാന് കത്ത് തയ്യാറാക്കിയിരുന്നു. എന്നാല്, കുടുംബശ്രീയുടെ ജില്ലാ മിഷനുമായി ബന്ധപ്പെട്ട് വിശ്രമകേന്ദ്രത്തിന്റെ പ്രവര്ത്തനം തുടങ്ങാനുള്ള പ്രവര്ത്തനങ്ങള് നടന്നതിനാല് ആ കത്ത് ജില്ലാ സെക്രട്ടറിക്ക് കൈമാറിയില്ലെന്നുമാണ് ഡി ആര് അനില് പറഞ്ഞതെന്ന് അംശു വാമദേവന് കൂട്ടിച്ചേര്ത്തു.